ماذا لو.. حلّوها في 24 ساعة؟

ماذا لو حلوها في 24 ساعة؟
ماذا لو حلوها في 24 ساعة؟

 – قوم يامه اسمع هالخبرية.. قوم
– يا صبّاح يا كريم يا فتّاح يا عليم.. خير يامه.. خبرية شو ع الصبح؟
– حلّوها يامه.. خلاص حلوها الحمد لله..
– وأنا مالي حلوها وللا ملّحوها.. بدي أنام لي ساعتين قبل سرحة النفق

– يا بنيي الله يرضى عليك قوم.. شوف شو بدك تسوي في الماتور.. يمكن تلاقي إلو بيعة قبل ما يروح سوقه..
– ماتور ايش يامه ع الصبح، وشو دخل ماتور 3 كيلو في الحلو والتطلي.. إنتي مش مركزة ولا مجمعة كلمتين ع بعض ليش؟..
– يامه بأحكي لكَ من الصبح انتهت مشكلة الكهربا وحلوها ومش رح تقطع تاني خالص
– لا ع 2 الظهر ولا ع 10 المسا؟
– أبداً .. أبداً..
– ولا ع 6 الصبح ولا ع 6 المسا؟
– لا يامه .. خلاص
– ولا قبل الإفطار ولا بعد الإفطار؟
– يي عليك يامه.. حكيت لك خلاص والله حلوها
– وايش باالنسبة للسحور؟
– ولا ع السحور كمان ياسيدي
– يا خراب بيتي.. خربت وما كانت ع البال
– خراب شو يامه كفى الله الشر.. بأحكي لك بطلت تقطع الكهربا.. يعني راح تنور على طول إن شاء الله
– في المشمش يا حجة.. اتنور في المشمش.. شو بدي أعمل في المصيبة هادي؟ ورطة.. يامه قولي إنهم رح يخفضوا القطع من 12 ساعة لـ 10 ساعات
– يووه.. شو هالحكي الفاضي!
– طيب 8 ساعات في اليوم؟
– لا إله إلا الله.. يامه مالك؟ إنت بدك الخراب إلنا وبس؟ مش مكفي الغسالة إللي خربت، وتلاجة أخوك إللي غيرنا ماتورها تلات مرات.. والتلفزيون اللي نام ريحه؟ ودفّاع المية اللي بطّل يصد ولا يرد؟
– ماهو إنت مش عارفة.. لو إنها إنحلت زي ما بتحكي شو راح يصير فيّ؟
– شو.. إنت كنت ناوي تفتح شركة كهربا يعني؟
– حاجة زي هيك.. بس على أوسع شوية.. طيب ولا 6 ساعات في اليوم؟
– وبعدين معك في الكلام الفاضي.. بأحكي لك حلوها.. جابوا كهربا من مصر، ما هي عندها زيادة زي ما بيحكوا في الراديو وإنها بتمد لسوريا وليبيا.. أخيراً حنوا علينا ومدوها لغزة..
– ياعيني ع الحنية.. احنا إلنا أكتر من 3 سنين في حصار وهَم وغم وغلا وبلا أزرق طلع ع جلدنا.. يعني نقحت عليهم الحنية هالوقت؟
– وين المشكلة؟ ما هوّا لازم يجي الوقت اللي فيه يحسوا بحالنا ومعاناتنا.. وهمنا.. معقول هم مبلدين وما عندهم إحساس لهالدرجة؟ وبعدين إنت إيش اللي مزعلك؟!.. فهمني

***

– أفهمك، وأمري إلى الله .. هادا بسلامتي أنا و5 شباب صحاب جمعنا مصاري من تجار كبار وصرافين عشان نشتري صفقة مواتير صيني من الأنفاق.. يعني عشان نساهم في كسر الحصار ونخفف عن الشعب.. وتأجرنا في كل مدينة بدل المحل اتنين.. و
– يوه.. وليش اتنين؟
– واحد لبيع مواتير الكهربا.. والتاني لتصليح المواتير يامه
– ليش هي المواتير الجديدة بدها تصليح كمان؟
– لا.. ما هو احنا اتفقنا نجيبها مواتير نص عمر.. يعني مواتير صيني.. خدني وارميني
– طيب الحمد لله يامه انكو ما عملتوا هيك شغلة.. لأنه هيك عمل ما بيرضي ربنا
– هو احنا عملنا واللي صار صار.. وأخدنا المصاري وبعتناها للسيناوي
– مين السيناوي هادا كمان؟
– البزنزس مان من سينا يامه.. من سينا.. رجعت طابا لينا فاكراها سينا؟
– طيب خلاص احكوا إلو بدناش.. وبين البايع والشاري يفتح الله
– صلي ع النبي ياحجة .. المواتير في النفق واليوم موعدنا نستلمها.. ودفعنا لصاحب النفق، ودفعنا للعمال، ودفعنا للأمين، وزبطنا وضعنا مع الناس في المنطقة.. حتى المحلات دفعنا إيجارها لخمس سنين قدام..
– واال .. بدكو نظل في هالمعاناة خمس سنين كمان؟
– لا ما هو احنا كمان  دفعنا عربون لشحنة من الصين فيها حاجات تانية زي.. كشافات.. وشمع.. ولامبات كاز.. وفوانيس رمضان.. و..
– وليش كل هاد؟
– عشان نغرق السوق، ونكتسح الـ..
– عبالي كنت تحكي من شوي عن كسر حصار وتخفيف معاناة الشعب
– يامه ومين ع بالو الشعب؟ ما هو كل الناس بيزبطوا وضعهم من ورا الحصار.. وهيك شغلات.. اشمعنى أجات ع حظي تنصلح الأحوال وترجع الكهربا؟ خللينا نشوف إلنا يوم زي العالم والناس
– يعني تنهب الناس عيني عينك؟
– ليش أنا من دون الناس اللي تحاسبيني؟.. وكل واحد ينهب ويمص دم هالشعب من جهته!.. قدام عينيك بيجي ابن الـ### كل يوم يتسلى ع السكينة.. ينزلها ويطلعها ع مزاجه كإنه بيلعب أتاري اللي خلفوه؟ هادا مصرح له يعني يعمل في الشعب اللي بده ياه.. ومش مهم نموت في الحر والرطوبة وقرف الصيف.. وهم يكذبوا علينا ما في سولار ما في غراب بين يشغل المحطة.. يسكروها أشرف إلهم من القرف اللي عيشونا فيه..

***

الصيدلي يبيع البامبرز المصري المهري على إنه أجنبي مستورد، والسوبر ماركت يبيع جالاكسي على إنها أصلية وهي أقل من تقليد، نضحك ع حالنا ونشرب كولا الضفة على إنها أردنية، وعصير أي كلام يبيعوه إلنا على إنه تابوزينا إسرائيلي، ولما يفتحوا المعابر بيضحكوا علينا ويسمحوا بدخول كاتشاب وشيبس ومايونيز.. كإنه هادا اللي ناقصنا، ولما تصلنا أجهزة الكهربا بنكون عارفين إنها كوري نص عمر وبندفع حقها الطاق اتنين، وبلطشة كهربا بنوديها ع المعمر عشرين مرة، ما هي الكهربا صار شغلها الشاغل تيجي ساعة تخرب هالأجهزة وتقصد لتاني يوم..

يامه صرنا نفكر في الكهربا ومواعيدها وحافظين جدولها أكتر من الصلاة؟  الناس طفشت من التراويح في الجوامع من قلة الكهربا.. والعالم ولا على باله اللي بيصير فينا.. كإنه قاعدين في مسلسل بيتفرجوا علينا..

– يعني هادا سبب إنك تزيد ع الناس همها وتبيع إلها مواتير وشغلات نص كوم؟
– يامه أنا كل اللي بدي ياه فرصة.. بس يظل الوضع على ما هو عليه لحد ما تنزل بضاعتنا السوق..
– قصدك تظل المعاناة لحد ما تورط الناس أكتر..
– لساتِك من شوية بتحكي ألحق أبيع الماتور قبل ما يروح سوقه.. وللا هادا مش توريط للناس؟
– هادا ماتور شغال مش ماتور نص كوم زي مواتيرك.. ورح نبيعه للناس عشان إحنا مش محتاجينه.. وناس كتير زينا رح تبيع مواتيرها.. وتستغني عنها بعد ما انزاحت الغمة والحمد لله وارتحنا من مشكلة الكهربا.. قوم الله يهديك .. اغسل وجهك والبس.. أنا رايحة أجهز لك فطور.. تطلع بعدها تشوف حل في قصتك الحزينة..
– والله ع رأيك.. قصة حزينة..

***

طيب شو راح يعمل الناس في مواتيرهم؟

والسولار اللي خزنوه براميل؟

والكشافات؟

أكيد رح يضرب سوق القداحات اللي بكشافات.. وترجع الناس للكبريت..

وتسكر محلات تصليح المواتير.. واللف، والتشحييم..

مين الأهبل اللي رح يفكر يسرق ماتور من قدام محل وللا من فوق سطح بيت بعد هيك؟
معقول يا ناس انحلت؟

والله رح نشتاق للعتمة وصوت المواتير في نص الليل..

والشوارع والمحلات ما فيها مواتير؟ طيب أنا لو مشيت في شارع الجندي وما سمعت صوت المواتير بأفكر حالي تايه..

يا عمي الناس خلاص تعودت.. يعني لو ما قطعت الكهربا الساعة 10 بالليل رح ينزْلوا الأمّانات ويشغْلوا المواتير.. حفاظاً على التقاليد زيهم زي أي مواطن يحترم مواعيد قطع الكهربا.. أظن إنه باقي شهرين والناس تسمي أولادها (ماتور) و (لامضة) زي ما سموا (معبر) و (إبرة)..

يا عالم معقول تيجي الكهربا، والسخانات تشتغل والناس تلاقي مية تتحمم كل يوم في هالصيف وتكوي ملابسها.. ونصير نحضر مباراة مصر والجزائر وللا الريال والبارشا وباب الحارة في البيت مش في الكافي ولا في زحمة الاستراحات؟

طيب وكيف بدهم يشتغلوا تبعون السياسة والمفاوضات بعد هيك؟ لو بجد انصلح حالها الكهربا والله ما يلاقوا زيها معاناة يحكوا عنها ومش بعيد الجزيرة تسكّر والفضائية تبطل من ورا هالقصة.. عن شو بدهم يحكوا مشاكل في غزة لما تنحل قصة الكهربا ؟

مين بدو يكتب عن حصار غزة، القصص والمقالات والشعر والمحفوظات؟ أصلاً الإنترنت مش ماشي سوقها إلا من ورا قطع الكهربا في غزة.. لو صارت جاية رح ينسونا العالم، وما حدا يفكر في غزة ولا فلسطين كلها..

حتضيع القضية.. وتطير القدس.. وبالأخير يحلقوا للأسرى ع الناشف.. آه والله.. ما هو خلاص انحلت قصة الكهربا وعاش الشعب في سبات ونبات وناموا عالكهربا والأمّانات ونسيوا المواتير والكشافات.. وبالمرة تكمل وما نلاقي شغل في الأنفاق ولا المواتير ولا الكشافات..
لاااا.. ما تحلوا مشكلة الكهربا.. الكهربا لازم تنقطع.. نعمة من ربنا إنه ما في عنا كهربا في غزة.. ما بدنا الكهربا.. حل مشكلة الكهربا في غزة باطل.. باااطل.. باااااطل

***

– اصحى يا (عزوز) .. اصحى.. شكلك بتحلم يا مسكين.. اسم الله عليك.. اصحي
– هيه.. وين أنا؟ وين أمي؟.. الماتور.. ايه.. الكهربا أجت؟
– صح النوم يا روح أمك.. بتحلم في الكهربا شكلك.. (فلّص اسنانك) يعني ابتسم أنت في رفح.. وفي أعمق نفق في المنطقة بلا منازع.. باينه قلة الأكسجين عملت عمايلها في مخك..
– لكن بجد شو اللي كنت تهدوسه  يا (عزوز) وإنت نايم؟.. حلّوها.. مواتير.. باااطل.. كإنك في فلم أبيض وأسود.. ما عرفنا نشتغل من هلوستك..
– ايييه.. الحمد لله إنه كان حلم.. قال حلوها قال..
هات لي الماتور حبيب قلبي أنام جنبه يطربني بصوته الحنون..
هات.. والله إحنا في نعمة ما حدا داري فيها..

عن Khaled Safi

خالد صافي مدرب في مجال الإعلام الجديد ومهتم بالتصوير والتصميم، حاصل على لقب سفير الشباب الفخري من وزير الشباب والرياضة التركية، حاز على جائزة أفضل مدونة عربية لعام 2012 من دويتشه فيله الألمانية.

شاهد أيضاً

الانتفاضة الثالثة في الضفة والانتفاضة الإلكترونية في غزة

ركزت التغريدات على انتهاكات الاحتلال الإسرائيلي على مدار العام وفي فترات ساقة لتثبت للجمهور المتلقي أن..

10 تعليقات

  1. ههههههه .. قال حلوها قال !!
    الله يكون بالعون وبس , دمار فظيع والله ..

    شكلنا حنعيش ونموت وتييجي اجيال وتروح أجيال والكهربا تروح بالمرة ونرجع للعصر الحجري كمان

    أريح للراس بمليون مرة .. بلا كهربا بلا بطيخ

    تحياتي

    خالد: اممم.. طيب وكيف راح تعيش بدون نت يابو حميد يا بركة 🙂 ؟

  2. ههههههههههههههههههههههههههه

    والله قلق جدا جدا جدا

    شو هالإبداع

    يا عمي الكهربا وقطعتها تاريخ وإرث للشعب الغزاوي بالأخص

    فعلا صارت جدول محفوظ أكثر من الصلاة

    انا في حياتي ما ضيعت صلاة التراويح إلا السنة هذه من قطعة الكهرباء

    على العموم أبدعت ما من كتبت

    وبوركت

    والأمل في وجه الله كبير وعظيم

    خالد: كان الله في العون
    ومن يتحمل هذا الوزر؟

  3. هه هه
    والله مقال بضحك وبنفس الوقت بحزن
    لأنه بحكي قصة بقعة صغيرة من العالم حِيرته وشغلته ..
    في كل مكان يسألونك عن الماتور والخزان إن كان مليان
    و حال الكهرب في كل دار كيف شغلها ليل ونهار ولا دمار
    آآآآخ منها من عيشة

    ربنا يلي مصبر هالشعب بهيك أجواء



    حلم تعيس على تجار المواتير
    ولكن في النهاية تبقى الحكاية كما هي منذ البداية
    لا تغيير في الحال سيبقى الماتور ماتور حتى لو رجعوا النور
    بكفي سيمفونية صوته .. خوووتان


    يعطيك الف عافية بشمهندس خالد ..
    دومت في تألق ورقي
    ربنا يحفظك ويبارك فيك يارب 🙂


    خالد: سلمت على مرورك والتعليق سمير
    عن نفسي أقسمت ألا ازعج أحد بصوت الماتور.. يعني ما رح أشتريه ولو قطعوا الكهربا ليوم القيامة

  4. أضحكتنا الكوميا السوداء حتى بكينا…
     

    خالد: الواقع أصعب وأمر
    وما سخريتنا من واقع مرير إلا لأن الطير الذبيح يرفرف من الألم
    كان الله في عوننا جميعاً..

  5. بتحلموا تيجي الكهربا زي العالم والناس

    خالد: وما يدريك لعل الحلم يصبح يوماً.. حقيقة

  6. أضحكتني يا خالد بهالكلام الغاية في الروعة..بس لازم يبقى الأمل موجود!
    (( يعني لو ما قطعت الكهربا الساعة 10 بالليل رح ينزْلوا الأمّانات ويشغْلوا المواتير.. حفاظاً على التقاليد ..)) عجبتني
    تحياتي..

    خالد: تغلغلت معاناة الكهرباء إلى ما تحت الجلود في غزة
    مشان هيك والله عيب لو إنا ما وقفنا ساعة حداد كل يوم الساعة 10 لو حلوها ورجعت الكهربا منتظمة

  7. أوحلوها ما حلوها …. والله صرت أشتاق لأيام الغربة بس بسبب الكهرب … بتفرج يا بشر

    خالد: اصبر
    حتى يدخل الإيمان في قلبك
    تحتاج لمزيد من الوقت (للتعميد) وتصير عميد الكهرباء الأبدي يا بشمهندس 🙂

  8. هههههه اضحك الله سنك واسعدك كما اضحكتنى يا استاذ خالد حقيقى مقالة رائعة جد واود ان ابارك لك بأتاحة التعليق بعد المعاناة الحمدلله يجب كل شى بتعلم والصبر ولاشى يات بسهولة وربنا يقدرنا ويصبرنا اود صراحة ان اقول التحمل والصبر والجهاد الدائم لشعبنا ولوطننا الغالى شى اصبح عادى ولكن يجب ان ناخذ بالاسباب ونواجه ونحل وايد بايد ونأمل ونطمح ولا نفقد الامل بالمزيد دائما ولو بحل بسيط كالتفكير والمثل بالدليل اليابان وطرق الجلول لكل مشكلة ماذا لو جمعنا كل فلوس انشرت بيها ماتور من كل واحد كان بنينا محطة جديدة بس دا ابتلاء وتمحيص للامة الى بتبعد عن بعض ومابتفكرش صح الله يهدينا جمعيا امييييمن يارب

    خالد: الحمد لله أعتقد أنه تم حل المشكلة
    مازلت لا أدري إن كان الحل جزئياً أم كلياً..
    هذه الحالة ما هي إلا واحدة من آلاف الأمثلة في غزة عن المعاناة لانقطاع الكهرباء ومشاكلها وقصص المواتير والكشافات والشمع والحرائق
    و…
    وكان الله في عون أهلنا في غزة..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Protected by WP Anti Spam