أفكار: كيف تجيب فكة للعيد في غزة؟

الفكة.. مشكلة المشاكل في العيد بغزة
بدك فكة ياخو؟ تعال اكبش :).. حقوق الصورة: حسون

معلش رح أكتب هادا الموضوع كله ولأول مرة باللهجة الغزاوية لأنه موجه لأهل غزة، وشغلهم الشاغل من أول رمضان، وهو قصة الفكة، وبما إنا مقبلين على العيد يعني ورطة الفكة، إذا بدك تعيّد أرحامك، العشرين شيكل هي الورقة السحرية والعلاج المثالي، خفيفة ع الجيب، لونها مميز، بتلمع، و ع رأي أهل غزة “بتطقطق” وكمان إلها وزن في إيد الحريم، والله الـ 50 شيكل كسرة للي عنده خمس طعشر مرا يعيّدهم، والـ 10 شيكل حديد ما هي منظر..

معك فكة؟ بتمشي، وبتطلع تعيّد ع بركة الله، ما معك خلليك في البيت، مش رح تلاقي مع السواق ولا في المحل ولا حتى بياع الجرجير رح يحن عليك ويفك لك 5 شيكل.

للأمانة في فكة في البلد وفكة كتيرة، بس لازم تتعب شوية، وتعمل حسابك إنك ح تخسر اشي بسيط مشان ترتاح كتير.

هنا شوية أفكار يمكن تنفع في حل أزمتك:

– أكيد ح تركّب كرت جوال تتصل ع أقاربك وأصحابك تعيّد عليهم، كرت فئة 20، لما تروح تشتريه خود معك 50 شيكل أو 100، ولو كرت فئة 50 بلاش خلليه 40 كرتين من مكانين وفي كل مرة ادفع 50 وخود الباقي فكة.

– كل سنة ع العيد بنشتري فسيخ،هالمرة اشتريه من السوبر ماركت وادفع 50 شيكل وتأكد رح يرجع لك الباقي وفيها عشرين خضرا.. هادا سوبر ماركت وعامل حسابه لهيك يوم..

– اشتري الحلويات والسكاكر من مكان والمكسرات من مكان تاني، وفي كل مرة ادفع 50 أو 100 وخود الباقي فكة.

– اشتري الفاكهة من كل البلد، واحد منه الموز والتاني المانجا والتالت الخوخ والرابع العنب وفي كل مرة ادفع 50 شيكل وخود الباقي فكة.

– أبو العيال راح يقعد 3 أيام العيد إجازة أو يزور الأرحام، شو المانع لو طلع يشتري بامبرز احتياط للأولاد من الصيدلية وياخد الباقي فكة؟

– مين مش رح يحلق شعره؟ أكيد حاجز لك دور عند الحلاق، والمؤكد لو مديت عليه 50 رح تلاقي عنده فكة.

هيك إنت خلصت أغراض العيد وبنفس الوقت فكيت 700 أو 800 شيكل ورجع لك منهم ع الأقل 500 شيكل فكة، خسرت 300؟ لا طبعا إنت عملت إدارة للمصروفات بحيث ترجع لك أكبر منفعة، إنت أساساً الـ 300 صارفهم صارفهم في أغراض العيد وطقاطيقه..

طيب.. لسه في كمان شوية مشاوير ممكن تفيد:

– العصر اقصد ع الجامع رح تلاقي حواليه الشـ.. بلاش.. المتسولين ألطف شوية، بشويش احكي معه أو معها: “أعطيك 5 شيكل وتفك لي 50 ؟” تأكد رح تلاقي معهم عشرينات وعشرينات شَفر كمان.

–  في ناس كتير بتطلع زكاة الفطر فلوس والأغلب – وهو الراجح – طعام، وبالعادة تنتشر مراكز استلام الزكاة في كل مكان بالبلد، طلع زكاة فطرك على دفعتين وفي كل مرة ادفع 100 شيكل وخود الباقي فكة، ولما تحسبها صح رح تلاقي حالك جبت ورق أخضر أكتر.

– آخر النهار لف على بياع الترمس وبياع المخللات والحمص والفلافل رح تلاقي عندهم أطنان فكة حديد، بتنفع للأولاد الصغار، طبعاً فك منه 50 شيكل مش 20، العشرين هادا كنز لا تفرط فيه مهما كان الثمن.

فكة حديد - غزة– ما بدك هادي الغلبة كلها اتفق مع صاحب في البنك يجيب لك أبو 500 أو 700 شيكل فكة بلون أخضر، ومش رح يقصر، ما هو بتجيهم بالشوالات من إسرائيل يا حج قبل العيد.

يوم العيد:

– طيب انت تورطت ولحد الآن ما فكيت وأجا العيد،وما معك إلا غراب البين الخمسينات والموت المستعجل الـ100 شيكل والبلا الأحمر الـ200 شيكل.. ما تعيّد؟ ما في حل؟ لا ما تقلق لسه في أمل، بس ركز شوية، لما تطلع تعيّد يا ريت تطلع في جماعة من العائلة مش فرداني، ولما يجي الدور لتكتكة الجيوب ومد المصاري خلليك في الآخر، اللي قبلك رح يمدوا العشرينات اللي أخدوها طبعاً من السوبر ماركت والصيدلية وبياع الترمس، خود منها 4 عشرينات واعطيها 100 بخفة إيد واعملها كإنها يعني مزحة، وأكيد رح تتقبلها منك وتنبسط.. أحسن من بلاش.

حل حصري:

– هو الصراحة في حل جديد ع الساحة بس مفيد، يعني حصري، ومش عارف كيف رح تستقله النسوان لو تم، بدل كل القصة والمشاوير اللي فوق، الناس نفسها ما تمد أكتر من 20 شيكل، روح على صراف وفك منه 200 دولار كلها عشرات وصير مد 10 دولار يعني 35 شيكل، أو 100 دينار فكها خمسات وعشرات، ومد 5 دنانير يعني 24 شيكل.

عن Khaled Safi

خالد صافي مدرب في مجال الإعلام الجديد ومهتم بالتصوير والتصميم، حاصل على لقب سفير الشباب الفخري من وزير الشباب والرياضة التركية، حاز على جائزة أفضل مدونة عربية لعام 2012 من دويتشه فيله الألمانية.

شاهد أيضاً

لماذا فشل مؤمن شويخ ستايل في شو يعني لحمة؟

أثارت الحلقة جدلاً كبيرًا على مواقع التواصل الاجتماعي بسبب أن المشهد مُبالغ فيه لكن الحقيقة أن هذا ليس هو السبب الوحيد للانتقاد..

5 تعليقات

  1. حلوه .. بس المشكلة كيف يجيبوا الماسك عشان يفكوا .. الله يعين العباد

    خالد:
    تسلم مهندسنا الغالي على مرورك الكريم وتعليقك
    وسؤالك أكيد في موضعه
    خصوصاً وحال أهلنا في غزة لا يخفى على أحد
    الله يكون في العون
    والحمد لله على كل حال

    وهي فرصة طيبة أن نهنئك: كل عام وأنت بألف خير

  2. والله وانا بدي اسأل نفس السؤال اللي فوق … كيف بدي اجيب الماسك حتى افكوه ؟؟

    أفكار مثمرة وجيدة وقابلة للتطبيق .. ممكن برضه الواحد يستنى بعد الناس ماتعيد بساعة او ساعتين وشوف الفكة كيف تنتشر في البلد .. يعني مش ضروري الواحد يفك ويعيد من اول اليوم ، خليه يستنى شوية لما تنزل الفكة في البلد ..

    خالد:
    اقتراحك جميل ويتبعه كثير من المعيّدين
    بس بصراحة ما إلو العيد بهجة وجمال في العيدية إلا أول يوم
    طيب ممكن يبعت لها العيدية كرت جوال مثلاً؟

  3. تسلم على الاقتراحات وهى هيك بتنعمل ، بس فى الاساس هو فى ماسك حتى نجيب فكة …هههههههههههههههه،، كل عام وانتم بخير ، كلها لعبة تجار وبعد العيد بساعتين بتلاقى الاف الشواكل تفكها هات بس ماسك .. تحياتى لكم

    خالد:
    الله يسعدك حبيبي ماهر
    أعرف أن كثيراً من التجار يحصن نفسه قبل هذه الفترة ويجهز كبشة فكة لهذه الأيام حتى يمشي شغله
    بس على رأيك نحتاج الأول ماسك مشان نجيب فكة نعيّد
    كان الله في العون

  4. ع فكره الفكه مش مشكله في العيد وكيف الناس راح تجيبها وتعيد بعض

    هادي مشكله للسواقين كمان ,مابيكون معهم فكه ليفكوا للراكب اللي معاهم وشو الحل وقتها يا بينزل من السياره يا إما بيوصلو السواق ع حسابو من غير ما يدفع بحجه ما في فكه ههه

    كل عام وانتم بخير يا جماعه

    خالد:
    صحيح ماذكرت
    وهو مثال من أمثلة كثيرة تحدث هذه الأيام
    كثيراً ما يحكي لك البائع ما في فكة معلش ما في مجال تشتري هادي الشغلة
    ورطة.. بصراحة
    كل عام وأنت بألف خير وصحة وهنا.. وبفكة

  5. بس تعرف اخي خالد بالنسبة لطريقة انك تحصل على الفكة من وانت طالع على غزة من رفح او العكس هاي انا اعارضك فيها، إلا في حالة واحدة، انك قبل ما تركب السيارة تقول للسائق ما معي فكرة وتفرجيه (تصدمه) بالورقة الحمرة او الفئة الي اقل منها لانه راح يعمل مشكلة وطبعا على حسب مزاج السواق او عصبيته.-مجرد رأي-

    خالد:
    عندك حق.. خصوصاً إنه عادي جداً يحكي لك إنزل معلش ما معي فكة 🙂

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Protected by WP Anti Spam